Stollen

Sou, dat éischt Rezept fir Chrëschtdag. Ee Stollen. Et ass zwar lo kee klassesche Stollen, et ass bësse méi eng „einfach“ Variant. Wat flott drun ass, dir kënnt e sou maache wéi en iech am beschte schmaacht.

Wat alles drakënnt:

500g Miel
1 Pak Bakpolver
200g Zocker
1 Pak Vanillzocker
175g Margarine
2 Eeër
250g Stoffi (Quark)
1 Pouz Salz
1/2 Flacon Bittermandel
1 Flacon Rhumaroma
½ Flacon Zitrounenaroma
125g Korinten
100g gemuelen Hieselnëss
125g gemuele Mandelen
200g Marzipan

Falls der wëllt :

40g Zitronat

50g Orangeat

oder

90g Fruits confits

Fir d’Glasur :

125g Botter

bësse Pudderzocker

Sou gëtt et gemaach :

D’Miel (gemëscht mam Bakpolver) an eng grouss Schossel maachen. An der Mëtt e klengt Lach an d’Miel drécken an d’Eeër (déi der virdrun an enger Schossel vermëscht hutt) doranner schëdden. De Stoffi, den Zocker, de Vanillzocker, d’Margarine, d’Salz, d’Aromen an d’Nëss derbäi maachen. Dann alles mat den Hänn zu engem Deeg knieden. Duerno kommen d’Korinten (an eeben och d’Fruits confits wann der da wëllt) derbäi. An da gëtt nach eemol alles gutt gekniet.

Lo deelt der den Deeg a 5 gläich grouss Portiounen (wann der mi grouss Stolle wëllt da maacht der manner Portiounen) a formt en zu 5 Stollen (all Stollen huet ongeféier 320g). De Marzipan deelt der och a 5 Stécker à 40 Gramm (dir kënnt es och roueg méi huelen, wann der gär méi Marzipan dran hätt) a rullt en zu 5 längelzege Strullen. Dir leet de Marzipan lo de laange Wee op äre Stollen a klappt den Deeg zou, soudass de Marzipan ganz an der Mëtt verstoppt ass.

Lo leet der d’Stollen op e Bakblech (vergiesst de Bakpabeier net) a loosst se am viergewiermte Schäffche bei 170 Grad Ëmloft ongeféier 40-45 Minutte goen.

Wann der d’Stollen aus dem Uewen huelt, da bepinselt der se direkt mam Botter (deen der virdru geschmolt hutt). Duerno loosst der se op engem Hiertchen ofkillen a wann se kal sinn, da maacht der nach bësse Pudderzocker driwwer.